Luk 5:1-11 | YomNWM | STEP | Lumbu kimosi yesu kaba muyenda disimu di mbu wu Ngenezaleti ayi sumbu nkangu wu batu wunzungidila mu diambu di wa mambu ma Nzambi,

Luke 5:1-11

Minlonguki mitheti

(Matayi 4.18-22 ; Malako 1.16-20)

1 Lumbu kimosi yesu kaba muyenda disimu di mbu wu Ngenezaleti ayi sumbu nkangu wu batu wunzungidila mu diambu di wa mambu ma Nzambi, 2 buna wumona minlungu miodi muyenda mbu. Minlobi mi zimbizi bakuluka kuawu mu minlungu miawu bila makondi mawu baba sukula. 3 Nlungu wumosi wuba wu Simoni. Yesu wukuma muawu ayi wunkambakatatukila fioti disimu. Buna wuvuanda muna nlungu ayi wutona longa nkangu.

4 Buna kamanisa yoluka, wukamba Simoni :

—Kuesa nlungu kungingi nlangu, kuna kuidi thimpula bosi ngeyo ayi bakundi baku lozanu makondi meno mu diambu di luloba.

5 Vayi Simoni wumvutudila :

—A nlongi, builu bumvimba tusedi vayi kadi kiasa tusia baka ko. Vayi sumbu wuthumini, ndieka loza makondi.

6 Baloza makondi ayi babaka zimbizi ziwombo ; ayi makondi mawu tsatu makanzuka. 7 Buna batumisa bakundi bawu bobo baba mu nlungu wunkaka muingi biza basadisa. Bayiza ayi minlungu mioso mimiodi miwala zimbizi, ayi tsatu midiama.

8 Bu kamona bobo, Simoni-Piela wufukama va malu ma Yesu ayi wunkamba :

—Pfumu, bika wuthatukila bila ndidi nkua masumu.

9 Muaki lukhuku lumbuila va kimosi ayi bakundi bandi mu mona phila zimbizi baloba. 10 Zaki ayi Yowani, bana ba Zebede, bakundi ba Simoni, mamvawu lukhuku lu babuila.

Buna Yesu wukamba Simoni :

—Bika mona tsisi bila tona buabu wela ba nlobi wu batu.

11 Bu bavutula minlungu miawu ku disimu, basia bika bibioso ayi balandakana Yesu.